المساعد الشخصي الرقمي

مشاهدة النسخة كاملة : أمثال خليجية


منصور الرميح
03-21-2010, 11:47 AM
اليوم بنفتح هالموضوع على شان نجيب امثال خليجية ...

أبو طبيع ما يجوز من طبعه


إذا طاح الجمل كثرت سكاكينه


إذا فات الفوت ما ينفع الصوت


إش حادك يا المسمار ؟ قال المطرقه

Hayder ALsaihati
03-21-2010, 03:40 PM
شكرا أخوي على الموضوع اللطيف

الفرس من خيالها ، والحرمة من ريّالها.


الحي يحييك ، والميت يزيدك غبن


اللي في القدر تطلعه الملاس

تحياتي

منصور الرميح
03-21-2010, 04:22 PM
مشرفنا حيدر
عساك ع القوة

شكرا لك

أبوسجيد
03-21-2010, 09:43 PM
تمشي بلا سروال كيف مسروله
- نبيه عون صار فرعون
- الزمن زمن القدرة حتى الدجاج أكل الخضرة
- النار ماتحرق الا رجل واطيها

- تحياتي لك,,,

منصور الرميح
03-22-2010, 09:57 AM
تحيتي لك ابو سجيد
وشكرا لك

Hayder ALsaihati
03-22-2010, 02:15 PM
الطول طول نخلة ، والعقل عقل اصخلة


من طلع من داره قل مقداره


اللي يبينا عيّت النفس تبغيه ، واللي نباه عيّا البخت لا يجيبه

تعب قلبي
03-22-2010, 07:14 PM
مشكورين والله يعطيكم العافية

منصور الرميح
03-22-2010, 10:54 PM
قواكم الله قواكم الله قواكم الله

إسأل مجرب ولا تسأل طبيب

امسك مجنونك لا يجيك اجن منه

إن طاعك الزمن وإلا طيعه

إنطر يا حمار ليمن يجيك الربيع

قلوب صغيره
03-22-2010, 11:44 PM
شرات العبد ولا ترباته
البيت بيت ابونا والقوم حاربونا
صفعه من ام ولابوسه من مرت ابو
الباب لا يجيك منه الريح سده وستريح

مشششششششششششششكور وايد على الموضوع

خوي الذيب
03-23-2010, 10:16 AM
ويش لك بالبحر واهواله .. ورزق الله على السيف

ما يحك ظهرك الا ظفرك

البيت بيت ابونا .. والغرب يطردونا

ويش جابرك على المر .. قال اللي أمر منه

اذا فات الفوت ما ينفع الصوت

قلوب صغيره
03-23-2010, 11:59 AM
حلات الثوب رقعته منه وفيه

دهنا في مكبتنا

إلا عنده دهن يدهن عشاه

مد ارجولك على قد الحافك

الناس في شلشله والعجوز تبي رجل

اقولك تيس تقول احلبه

بنت العشافه قرعه

لو الكل نجر ماضل في الوادي شجر

لو تكد كد الوحوش غير رزقك ما تحوش

Hayder ALsaihati
03-24-2010, 07:25 PM
الشيفه شيفه ، والمعاني ضعيفه


البعد بعد القلوب موب بعد الدروب


من طول الغيبات ياب الغنايم


تموت الديايه وعينها على السبوس

منصور الرميح
03-24-2010, 09:15 PM
ما شاء الله عليكم ... قواكم الله

بس حيدر ابغيك تشرح للشباب كلمة السبوس في آخر مثل

Hayder ALsaihati
03-25-2010, 02:54 AM
يعطيكم العافيه

هذا شرح المثل الأخير :

يدل على الطمع والمقصود به طمع الإنسان الذي اقترب من الموت ومع ذلك مازال يركض وراء الدنيا ومتاعها ..

بنوته كيوت
03-25-2010, 07:57 AM
مشكور اخي العزيز ويعطيك الف عافيه وانا اضيف عده امثله :
· · إذا بغيت صاحبك دوم حاسبه كل يوم
· · إذا حبتك عيني ما ضامك الدهر
· · إذا صار رفيجك حلو لا تاكله كله
· · إذا طاح الجمل كثرت سكاكينه
· · إذا طبع دوس على تريجه
· · إسأل مجرب ولا تسأل طبيب
· · إش حادك يا مسمار ؟ قال المطرقه
· · إصرف ما في الجيب يأتيك ما في الغيب
· · أضبط من ساعة الملا
· · اقبض من دبش
· · أقضب مجنونك لا يجيك أجن منه
· · إكل اللي يعجبك وإلبس اللي يعجب الناس
· · إما طلعه ولا طبعه
· · إنطر يا حمار لما يجيك الربيع
· · إنفخ يا شريم قال ماكو برطم
· · الباب اللي يجيك منه الريح سده وإستريح
· · بات مظلوم ولا تبات ظالم
· · بغاها طرب صارت نشب
· · بغى يكحلها عماها
· · تجيك التهايم وإنت نايم
· · ثوب أطول منك يعتك
· · جارك ثم دارك
· · حاميها حراميها
· · خبز خبزتيه يا الرفله إكليه
· · دابة الله بأرض الله
· · شبعونا طراقات وشبعناهم شتايم
· · طارت الطيور بأرزاقها
· · عومه مأكوله ومذمومه
· · فال الله ولا فالك
· · قراقيع صيف
· · كثر الدق يفك اللحام
· · اللي بالجدر يطلعه الملاس
· · اللي ما يستحي منك لا تستحي منه
· · اللي ما يطول العنب يقول حامض
· · اللي ما يطيع يضيع
· · اللي ما يعرف الصقر يشويه
· · اللي ماله أول ماله تالي
· · اللي مو على دينك ما يعينك
· · اللي هذا أوله ينعاف تاليه
· · اللي يجي من الله حياه الله
· · ما تعينك إلا يمينك
· · مخروش طاح بكروش
· · نصيبك يصيبك
· · الوجه من الوجه أبيض
· يمدح السوق من ربح فيه

مع تحياتي وشكرا على فتح هل الصفحه

صدى الذكرى
05-01-2011, 03:08 AM
موضوع لأبو أمين عجبني جدا

ومفيد لأخذ العبرة فحبيت أشارك فيه ليبرز ويشوف النور من جديد ويستفيدون ويردون الاعضاء الجدد الي

ماشافو الموضوع قبل

مشكور عم بو منصور وباقي على القمه

محمد الصايغ
05-02-2011, 11:03 PM
مثل قديم يقول (والظاهر إنه سيهاتي الأصل) :

" يوم خلص الدف..يات العيوز تلهف"

يعني ..

يوم خلصوا الدف (الطبل أو الطارة) جات العجوز متأخرة تلهف (تلهث)..